Дефинирање на Алтернативниот туризам

Желбата за бегство од индустријализираноста и брзото темпото на живот придонесува луѓето сè почесто да го избираат алтернативниот туризам како начин на одмор во денешно време. Враќање кон природата, допирот со традицијата и сопствените корени се задоволства што современиот турист сè почесто ги бара.

              

Македонија има одлични услови за развој на велосипедскиот, културниот, винскиот, селскиот, пештерскиот туризам и еко-туризмот. Пределите како Вевчани, Брајчино, Коњско, Берово, се само мал дел од местата каде што може да се развива селскиот туризам и еко-туризмот. Имаме можност да понудиме одлични предели за планински велосипедски туризам на Шар Планина, Маврово, Галичица, Водно. Пештерите Врело, Пешна, Убава, Шаркова Дупка, Алилица, Слатинска, нудат можности за развој на спелеотуризмот или на рекреативниот туризам. Меѓу другото, Македонија изобилува со голем број на културно-историски споменици, бањи, национални паркови, а сето тоа, доколку се искористи, може многу да придонесе за развој на регионот и да се зголеми бројот на работни места.

  

Македонија има огромен потенцијал за развој на алтернативниот туризам, но она што најмногу недостасува е добра меѓународна промоција. Еден пример за тоа се Колешинските Водопади близу Струмица, кои од 2005 година се промовираат и оттогаш, па досега бројот на туристите се зголемил за сто проценти.